Юрый Малееў: «Нам сёння не хапіла рэалізацыі»

Галоўны трэнер жаночай нацыянальнай зборнай Беларусі адказаў на пытанні журналістаў пасля матча кваліфікацыі чэмпіянату Еўропы УЕФА 2021 году супраць Уэльса.

- Нам сёння не хапіла рэалізацыі. Калі б мы забілі першымі гол - зусім па-іншаму бы ўсё склалася і нам псіхалагічна лягчэй было б гуляць, маглі б перастроіцца і згуляць па-іншаму. А так не забіваеш ты - забіваюць табе.

- Здзівіў чымсьці Уэльс?

- Не, абсалютна нічым не здзівілі. Да гэтага мы рыхтаваліся. Адзінае, што ў іх капітан каманды сёння не гуляў. Гэта была нечаканасць. Тактычны малюнак у Уэльса быў вытрыманы, 3-4-3. Да гэтага мы былі гатовыя, але рыхтавацца адно, а на полі ўсё вырашае іншае - момант, паўмомант, шчаслівы выпадак ці поспех.

- Склад практычна той жа, што гуляў супраць Нарвегіі. Не было асцярогі, што ў канцы матчу дзяўчынкі могуць падсесці фізічна?

- Усё ўпіраецца ў мяч. Забіты гол надаў бы сілы, эмоцыі і жаданне пакінуць усе сілы на футбольным полі. У нас былі добрыя моманты забіць. Не рэалізавалі. Нам забілі і гэта нас падкасіла, што было цяжка вылезці з гэтай сітуацыі. А так баяўся, бо тая гульня з Нарвегіяй адабрала шмат фізічных сіл, але мы досыць нядрэнна адрэагавалі ў плане аднаўлення. І я не скажу, што каманда глядзелася досыць стомленай.

- З чым звязана замена ў 1 тайме?

- Ну вось гэта відавочны прыклад таго, што яна не аднавілася. Ведаючы Карыну, як яна можа гуляць ... сёння яна была безыніцыятыўная, млявая, у нас нічога не атрымлівалася, шмат на ёй мячоў гублялася. Сэнс цягнуць да перапынку, мучаць і сябе, і яе, і ўсю каманду?

- Што з Таняй Красновай?

- Падазрэнне на пералом рэбраў. Павезлі на хуткай.

- Падвядзіце вынік вашай працай са зборнай: уражанні, што атрымалася, што не?

- З клубам нашмат лягчэй працаваць: ты кожны дзень, бачыш, адчуваеш. Можаш найграць пэўныя камбінацыі. Тут каманда збіраецца, 3-4 дні і павінен хутка зрэагаваць, што не так - хтосьці стаміўся, хтосьці траўмаваны. У мяне галава кругам ішла, дзесьці і не ведаў, за што хапацца. Калі падвесці вынік, то за ўвесь год каманда пацярпела 2 паразы: з Нарвегіяй вельмі балючае і сёння, якое, я лічу, абсалютна мы не заслугоўвалі. Лічу, што каманда правяла нядрэнны год. Так, таварыскія гульні - гэта таварыскія, а афіцыйныя - гэта афіцыйныя. Тут напал барацьбы і заўзятасці ніхто нічога не заменіць. У таварыскіх можаш памыліцца і гэта «ну добра». А тут гэта ачкі, вынік. Калі браць па 5-бальнай сістэме, то на моцную 3-ку нацыянальная зборная выступіла. Гэта чыста маё суб'ектыўнае меркаванне.