Беларусь - Эстонія. Не даціснулі
Першы тайм матчу аказаўся вельмі падобным на першую палову сустрэчы талінскага спаткання каманд: мінімум небяспечных момантаў і гульня пераважна ў цэнтры поля. Самыя рэальныя магчымасці забіць каманды мелі на зыходзе траціны гадзіны. Спачатку Васільеў прабіў з выгаднага становішча ў штангу, а на дабіванні неверагодным чынам ня здолеў трапіць ва ўжо пустую браму. Не прайшло і хвіліны, як у атацы ў адказ «белакрылыя» зарабілі штрафны, падача з якога ад Стасевіча прывяла да небяспечнага ўдару Драгуна - бліскучым сейвам вылучыўся галкіпер гасцей.
Беларусы больш актыўна пачалі другі тайм і на 50 хвіліне абавязаны былі выходзіць наперад: Савіцкі знайшоў у штрафной Драгуна, які прыняў абаронцу, але не здолеў у блізкім бою перайграць Лепметса. Праз 12 хвілін зноў Станіслаў Другун біў з перспектыўнай пазіцыі ў штрафной, але і ў гэты раз шыкоўна згуляў галкіпер Эстоніі. «Белакрылыя» да канца сустрэчы мелі яшчэ некалькі добрых момантаў, але зняць чары з брамы гасцей так і не змаглі - 0:0.
Адзначым, што дэбютны паядынак у футболцы нацыянальнай зборнай правёў Віталь Лісаковіч.
