Ягор Філіпенка завяршыў кар’еру ў нацыянальнай зборнай

У форме галоўнай каманды краіны 31-гадовы мінчук дэбютаваў 12 верасня 2007 года. У рамках адборачнага турніра чэмпіяната Еўропы-2008 футбаліст выйшаў на поле стадыена «Здзежэле», што ў Цэле — і, замяніўшы Генадзя Блізнюка, правеў у матчы 16 хвілін. У тым двубоі беларусы саступілі славенцам 0:1.

Надалей Філіпенка правеў паўсотні сустрэч у складзе нацыянальнай дружыны і адзначыўся адным трапным стрэлам. Адзначыцца голам Ягор здолеў у 2013 годзе, калі ўдарам галавой ен засмуціў Уга Льярыса ў супрацьстаянні «белакрылых» і зборнай Францыі ў Гомелі (2:4).

Дадамо, што акрамя галоўнай каманды краіны абаронца правеў 21 двубой у шыхтах «маладзежкі» — і стаў бронзавым прызерам U-21 чэмпіяната Еўропы-2011 года.

Ягор ФІЛІПЕНКА: «Хачу падзякаваць заўзятарам за падтрымку, якую адчуваў усе тыя гады, што правеў у зборнай. Спадзяюся, што беларусы і далей будуць шчыра падтрымліваць сваіх хлапцоў і захоўваць веру ў іх, з якімі б цяжкасцямі ні сутыкалася каманда. З цеплыней буду згадваць час, што правеў у форме зборнай. І шчыра разлічваю на тое, што футбалісты, якія прыйдуць на мае месца, здолеюць дамагчыся громкіх перамог і падаруюць заўзятарам мноства пазітыўных эмоцый».

Асацыяцыя «Беларуская федэрацыя футбола» дзякуе Ягору за выступы ў складзе зборнай і жадае яму поспехаў у далейшых выступах на клубным узроўні.