Беларусь - Узбекістан. Першы блін не камяком
«Белакрылыя» згулялі дэбютны матч 2020 года.
Пачатак сустрэчы прайшоў у роўнай барацьбе, з мінімумам небяспечных момантаў. Каманды доўгі час прыглядаліся адна да адной, не рызыкуючы адразу ісці вялікімі сіламі наперад. У сярэдзіне тайма беларусы перайшлі «ад слоў да справы» і адзін з першых сваіх галявых момантаў здолелі звярнуць у гол - Стасевіч выдаў шыкоўную перадачу ўразрэз на Няхайчыка, які зблізіўся з галкіперам, абыграў яго і пакаціў мяч у пустую браму. На 38 хвіліне рэальную магчымасць павялічыць лік не рэалізаваў Юрый Кендыш - магутны ўдар беларуса парыраваў Суюнаў.
У пачатку другога тайма «белакрылыя» мелі дзве шыкоўныя магчымасці вызначыцца. На 57 хвіліне ўзбекі не па правілах спынілі ў штрафной Ігара Бурко. На жаль, Станіслаў Драгун з «кропкі» не здолеў перайграць галкіпера. Ужо праз хвіліну Мікіта Корзун вывеў Паўла Няхайчыка сам-насам з Суюнавым, але ўдар барысаўчаніна прыняла на сябе перакладзіна. Да самага фінальнага свістка беларусы мелі некалькі добрых момантаў, каб змяніць «1» на «2» на табло, але недакладнасці ў завяршэнні і ўпэўненая гульня брамніка Узбекістана не дазволілі гэтага зрабіць.
Адзначым, што ў матчы супраць Узбекістана ў складзе «белакрылых» дэбютавалі Дзмітрый Падстрэлаў, Сяргей Карповіч і Максім Швяцоў.
