Балгарыя - Беларусь. Выязная перамога
«Белакрылыя» правялі гасцявы матч у Сафіі.
Галоўнай дзеючай асобай на пачатку паядынку стаў Ягор Хаткевіч. Дэбютант зборнай ужо ў першыя 10 хвілін тройчы выручыў беларусаў і не дазволіў балгарам правесці хуткі мяч. Госці ж да сваіх момантаў паставіліся больш беражліва і адну з першых актыўных вылазак наперад звярнулі ў гол. Віталь Лісаковіч выдатна пазмагаўся на лініі штрафной, пасля чаго мяч адскочыў да Дзмітрыя Падстрэлава, хвосткі ўдар якога і адкрыў лік у матчы. Пасля забітага гола гульня трохі супакоілася і ажывілася толькі ў канцоўцы тайма, калі гаспадары арганізавалі дзве небяспечныя атакі. Зноў вышэй усякіх хвал згуляў Ягор Хаткевіч.
Характар паядынку пасля перапынку істотна не змяніўся: гаспадары хоць і валодалі тэрытарыяльнай перавагай, але сапраўды галявых момантаў амаль не мелі. Адну з самых перспектыўных магчымасцей вызначыцца балгары ўпусцілі на 70 хвіліне - мяч, пасля ўдару Міланава, праляцеў у лічаных сантыметрах над перакладзінай. Беларусы ж маглі здымаць усе пытанні па зыходу матчу праз 3 хвіліны. Контратака 3 у 2 завяршылася магутным ударам Дзмітрыя Падстрэлава з забойнай пазіцыі. Нажаль, вызначыцца другім голам у другім паядынку за «белакрылых» нападаючы не змог.
Фінальны свісток зафіксаваў мінімальную перамогу Беларусі 0:1.
Адзначым, што ў складзе беларусаў, акрамя Ягора Хаткевіча, дэбютавалі Аляксандр Пазняк, Мікіта Сцяпанаў, Сяргей Волкаў, Раман Вягера і Раман Юзапчук.
