Беларусь - Эстонія. Доўгачаканая перамога
Каманды актыўна правялі першую палову сустрэчы, але гледачы галоў у першую 45-хвілінку так і не ўбачылі. Як аказалася пазней, усе трапныя стрэлы каманды нарыхтвалі на другі тайм.
У самым дэбюце другой паловы сустрэчы свой першы гол у футболцы «белакрылых» забіў Мікіта Навумаў - абаронца замкнуў навес з флангу ад Стасевіча. На жаль, ужо праз 5 хвілін Сорга замкнуў прастрэл Кяйта і зраўняў лік. Беларусы не змірыліся з такім становішчам спраў і ўсімі сіламі спрабавалі вырваць перамогу. «Белакрылыя» правялі пару шыкоўных атак, але мяч упарта не ішоў у вароты Лепметса - некалькі разоў гаспадароў ратаваў каркас брамы.
Удача усміхнулася беларусам ужо ў дадатковы час - Максім Скавыш ў падкаце замкнуў перадачу з флангу і прынёс першую перамогу Беларусі ў кваліфікацыі да ЧЕ-2020.
Дэбютныя матчы ў футболцы «белакрылых» правялі Іван Бахар і Яўген Яблонскі. Сваю 30 сустрэчу ў складзе зборнай правёў Сяргей Паліцевіч і Іван Маеўскі. Для Станіслава Драгуна гэта была юбілейная 60-ая гульня.
