Чарнагорыя - Беларусь. Саступаем у гасцях
«Белакрылыя» правялі таварыскі матч у Падгорыцы.
Пачатак сустрэчы выдаўся для беларусаў проста кашмарным - ужо да 14 хвіліны гаспадары двойчы паразілі браму Сяргея Чэрніка. Спачатку Мугоша з блізкай адлегласці замкнуў падачу з флангу ад партнёра, а затым Хакшабанавіч атрымаў мяч на мяжы штрафной і дакладным ударам паразіў далёкі кут брамы «белакрылых». На 23 хвіліне цудоўны сэйв галкіпера беларусаў пасля кутняга не дазволіў ліку стаць і зусім разгромным. Да канца тайма нашы хлопцы змаглі адсунуць гульню ад сваіх варот і мелі некалькі перспектыўных падыходаў да валоданняў Шаркіча, але больш галоў у першую 45-хвілінку гледачы не ўбачылі.
У перапынку Міхаіл Мархель унёс адразу 4 змены ў склад, што, у сваю чаргу, унесла пэўныя карэктывы ў гульню беларусаў. Госці сталі часцей валодаць мячом, імкнучыся як мага больш напружваць абарону чарнагорцаў. Гаспадары апынуліся да гэтага гатовыя і ў сваіх абарончых дзеяннях выглядалі ледзь не ўзорна. «Белакрылыя» так і не здолелі знайсці ключы да брамы Чарнагорыі - гасцявая параза 0:2.
