Германія - Беларусь. На мінорнай ноце
«Белакрылыя» правялі заключны матч кваліфікацыі ЕЎРА-2020.
З першых секунд матчу беларусы апынуліся пад шчыльным прэсам гаспадароў, толькі зрэдку пераходзячы цэнтр поля. Да гонару гасцей, «белакрылыя» добра абараняліся, не дазваляючы немцам ствараць па-сапраўднаму небяспечныя моманты ля варот Аляксандра Гутара. На 40 хвіліне беларусы перахапілі мяч у цэнтры поля і ў хуткай атацы маглі выходзіць наперад - шыкоўны ўдар Стасевіча не менш шыкоўным сэйвам парыраваў Ноер. На жаль, але праз хвіліну спрацавала старая футбольная мудрасць і ў атацы ў адказ Германія здолела вызначыцца - Гінтэр замкнуў прастрэл Гнабры.
«Бундэстым» актыўна пачала другую палову сустрэчы і ўжо на 49 хвіліне ўмацавала сваю перавагу: пасля розыгрышу кутняга Гарэцка дакладным ударам паразіў ніжні кут брамы Гутара. На 55 хвіліне лік стаў і наогул буйным - Кроас, ударам з-за межаў штрафной плошчы, прымусіў капітуляваць галкіпера беларусаў. Найбольш рэальную магчымасць размачыць лік госці мелі на 75 хвіліне - на жаль, Ігар Стасевіч не здолеў перайграць Ноера з «кропкі». Канчатковыя лічбы на табло ўсталяваў Кроас на 84 хвіліне - заканчваем адбор гасцявой паразай 4:0.
Адзначым, што дэбютны паядынак у складзе нацыянальнай зборнай правёў Дзмітрый Бяссмертны.
