Германія - Беларусь. Перад матчам

Нацыянальная зборная рыхтуецца да заключнага матчу кваліфікацыі чэмпіянату Еўропы УЕФА 2020.

Сёння вечарам прайшла перадматчавая трэніроўка каманды, якая заняла крыху больш за гадзіну. Упор быў зроблены на бегавыя практыкаванні і стандарты. Таксама хлопцы згулялі па «квадратах» і зладзілі двухбакоўку. Затым адбылася перадматчавая прэс-канферэнцыя нашай каманды. Міхаіл Мархель адказваў на пытанні журналістаў у кампаніі абаронцы Аляксандра Паўлаўца.

Да матчу рыхтуюцца ўсе выкліканыя 23 футбаліста.

Паядынак стане трэцім у гісторыі супрацьстаяння нацыянальных зборных Беларусі і Германіі. У 2008 годзе каманды сустракаліся ў таварыскім матчы ў Кайзерслаўтэрне і не змаглі выявіць пераможцу - 2:2. Дублем у складзе беларусаў адзначыўся Віталь Булыга. У чэрвені гэтага года калектывы гулялі ў Барысаве ў рамках адбору да ЕЎРА-дня 2020: госці апынуліся мацней 2:0.

Лёсаванне неаднаразова зводзіла нашы краіны на клубным узроўні. Першае спатканне беларускіх і нямецкіх клубаў на еўраарэне датавана 1993 годам. У 1/16 фіналу Лігі Чэмпіёнаў мінскае «Дынама» сустракалася з брэменскім «Вердэрам». У гасцях «дынамаўцы» былі бітыя 5:2, а дома згулялі ўнічыю 1:1. Праз 2 гады мінчукам зноў выпаў брэменскі «Вердэр» - праўда ўжо ў 1/16 фіналу Кубка УЕФА. І зноў беларускі клуб не здолеў прайсці далей - параза 5:0 у гасцях і хатняя перамога 2:1. Самымі памятнымі для айчынных заўзятараў застаюцца сустрэчы барысаўскага БАТЭ з «Баварыяй» і «Кёльнам». 2 кастрычніка 2012 «жоўта-сінія» дамагліся сенсацыйнай перамогі над зорным клубам з Баварыі - 3:1, а 19 кастрычніка 2017 мінімальна абыгралі дома «Кёльн» - 1:0.

Заўтра дэбютаваць за нацыянальную зборную могуць Антон Чычкан і Дзмітрый Бяссмертны, а Аляксандр Мартыновіч правесці 70-ый матч у футболцы «белакрылых».

Маючы адбыцца матч Германія - Беларусь пройдзе заўтра на стадыёне «Барусія Парк» і пачнецца ў 22.45 па беларускім часе. Гульня будзе паказана ў прамым эфіры тэлеканала «Беларусь 5».