Міхаіл Мархель: «Не Чарнагорыя нас абыграла, а мы прайгралі»

Галоўны трэнер нацыянальнай зборнай Беларусі падвёў вынікі матчу супраць Чарнагорыі.

- Цяжка казаць па гарачых слядах. Трэба будзе прааналізаваць, у нас будзе на гэта час. Першае ўражанне: гульня ў нас не атрымалася. Ні з пункту гледжання выніку, ні з пункту гледжання якасці гульні.

- У першым тайме каманда не была настроена на барацьбу, саступіла практычна ва ўсіх кампанентах. Чаму так?

- Не магу не пагадзіцца. Паўтаруся, па гарачых слядах мне цяжка сказаць, чаму так атрымалася. Трэба добра прааналізаваць гэтую сітуацыю і зрабіць усё магчымае, каб гэта не паўтаралася. Мы ўмеем і можам гуляць лепш. Чаму не прадэманстравалі - мне цяжка сказаць.

- Ці былі здзіўлены актыўнасці чарнагорцаў у першым тайме?

- Мы былі гатовыя да такой гульні Чарнагорыі. Напэўна, я б сказаў так: не Чарнагорыя нас абыграла, а мы прайгралі.

- Няхайчык з Лапцевым стварылі галявыя моманты. Ці будзеце вы іх больш выкарыстоўваць?

- Нікога не скідваем з рахункаў. Будзем глядзець вельмі ўважліва. Перад наступным зборам у нас ёсць пэўны прамежак часу. Будзем уважліва назіраць, якія будуць водгукі ў клубах. Адпаведна, будзем вызначацца з гульцамі, і выклікаць ці не выклікаць.

- Па гульні каманда выглядала горш, чым у матчы з Германіяй. Вы ўяўляеце рэакцыю заўзятараў у Беларусі пасля гэтай гульні?

- Прыкладна ўяўляю. Нам хацелася скончыць сезон на мажорнай ноце. На жаль не атрымалася. Не хацеў бы па персаналіях кагосьці вінаваціць. Трэба прааналізаваць сваю працу.