Уэльс - Беларусь. Мінімальная параза
«Белакрылыя» саступілі ў Кардыфе.
Гаспадары, як і належыць фаварытам сустрэчы, больш актыўна пачалі паядынак, адразу завалодаўшы тэрытарыяльнай перавагай. Беларусы пісьменна абараняліся, не забываючы пры магчымасці бегчы ў контратакі. На 17 хвіліне адна з такіх перспектыўных вылазак наперад скончылася для «белакрылых» стратай, чым не прамінулі скарыстацца валійцы: Уільямс адрасаваў мяч Джэймсу, які прыгожым ударам трапіў у правы далёкі кут. Пасля забітага гола малюнак гульні сур'ёзным чынам не змяніўся - Уэльс працягваў дзейнічаць першым нумарам, але сур'ёзную небяспеку каля ўладанняў Максіма Плотнікава беларусы гаспадарам ствараць не дазвалялі.
Пасля перапынку «белакрылыя» больш актыўна зайгралі наперадзе, імкнучыся дзейнічаць на сустрэчных курсах, але перавесці «колькасць» перспектыўных атак у «якасць» так і не змаглі - мінімальная гасцявая параза 1:0.
Адзначым, што Максім Скавыш правёў свой 15-ы матч за галоўную футбольную каманду краіны, а Максім Плотнікаў, Захар Волкаў, Мікалай Золатаў, Макс Эбонг і Кірыл Пячэнін дэбютавалі ў складзе нацыянальнай зборнай Беларусі.
